غزل
موجۂ عمر گریزاں کی روانی جیسا
آنکھ میں کچھ تو ہے ٹھہرے ہوئے پانی جیسا
زرد پڑتے ہوئے پھولوں میں دھنک کی ترتیب
زندگی میں یہ عجب موڑ کہانی جیسا
اس طرح چھلکے ترے ہونٹ کہ وقت رخصت
رہ گیا کچھ مرے ماتھے پہ نشانی جیسا
میں نے کل رات ترے دل میں چمکتے دیکھا
ایک پیکر مری بھرپور جوانی جیسا
میں تری شاخ تحیر پہ مہکتا ہوا پھول
تو مرے خواب محبت کے معانی جیسا
اس کے چھونے سے ہوا قوس قزح میں تبدیل
تھا جو اک رنگ مری روح میں دھانی جیسا
وصل آہنگ ہوا جاتا ہے کچھ روز سے پھر
میرا اسلوب سخن ہجر بیانی جیسا
صائمہ زیدی