غزل
وہ انداز حسن نظر اول اول
وہ جام مئے تیز تر اول اول
درخشاں نگاہوں میں معصوم جلوے
وہ تنویر لعل و گہر اول اول
وہ چھایا ہوا نشۂ نوجوانی
وہ اک عالم کر و فر اول اول
وہ رعنائیٔ حسن سادہ و دل کش
وہ اک جلوۂ کارگر اول اول
دل و دیدہ ناگاہ محو تحیر
کچھ اس طور وہ جلوہ گر اول اول
رہ عشق و الفت میں ہم یوں رواں ہیں
کسی کا ہو جیسے سفر اول اول
نکھرتا ہوا رنگ رخ کا وہ عالم
فروزاں کہ جیسے سحر اول اول
بہر نوع اک حسن شہ کار قدرت
وہ اک پیکر خوب تر اول اول
وہ اک شوق پیہم کا رنگیں تصرف
دعا اول اول اثر اول اول
بیاں کیا ہو انعامؔ آغاز الفت
وہ اک ذوق دیوانہ گر اول اول
انعام تھانوی