وہ نہیں ھے تو جنوں خواب ھے اور کچھ بھی نہیں
زندگی نقشِ سرِ آب ھے اور کچھ بھی نہیں
ھے وہ مہتاب بدن دل میں تو یہ رنگِ جہاں
رنگِ پیرا ھنِ مہتاب ھے اور کچھ بھی نہیں
دل میں کھل پائے نہ ھوں زخمِ تمنا تو یہ عشق
ایک دریا ھے جو پایاب ھے اور کچھ بھی نہیں
اس نے سیرا ب نہ رکھا هو رفاقت سے اگر
دشتِ جاں خطہ ء بے آب ھے اور کچھ بھی نہیں
نیند آتی ھے تر ے خواب کی خواہش میں مگر
بے سکونی صلہ ء خواب ھے اور کچھ بھی نہیں
موجہ ء عشق میں ڈوبی تو کھلا اس کا فسوں
ایک سایہ پس ِ گرداب ھے اور کچھ بھی نہیں
یہ جو مجھ کو نہ کبھی چین سے جینا آیا
یہ مری فطرتِ سیماب ھے اور کچھ بھی نہیں
یہ اداسی جو سرِ بزم ِ جہاں پھیلی ھے
میری تنہائی کا اک باب ھے اور کچھ بھی نہیں
راکھ کر دے کہ مری خاک کو كندن کر دے
عشق اک شعلہ ء بیتاب ھے اور کچھ بھی نہیں
زخم کھا کر کسی دشمن کو دعا دے دینا
پاِ پابندی ء آداب ھے اور کچھ بھی نہیں
تیر آتے ہیں مسلسل مری جانب جس سے
وہ مرا حلقہ ء احباب ھے اور کچھ بھی نہیں
عمر جس گھر کو بنا نے کی تگ و دو میں کٹی
وہ اذیت بھرا اک خواب ھے اور کچھ بھی نہیں
پروین حیدر