کب تک نہ پلائے گا بتا۔۔۔۔۔۔۔۔۔۔ پیرِمُغاں اور
کب تک رہیں یہ بادہ کشاں، تشنہ دہاں اور
کھل جائے گا یہ تیری سخاوت کا بھرم بھی
رکھونگا کہاں تک میں بھلا۔۔۔۔۔ بند زباں اور
کچھ تو مرے اشعار ہیں شوخی سے عبارت
ڈھاتے ہیں ستم لالہ رخاں ، سر و قداں اور
اس طرح بجھا پاؤ گے تم۔۔۔ عشق کے شعلے ؟
چھڑکو ہو جو پانی کو، تو اٹھے ہے دھواں اور
میں بھی اسی دنیا کا ہوں بیگانگی کیسی
کیا میرا جہاں اور ہے۔۔ اور تیرا جہاں اور
اس بار بہاروں میں بھی پژمردہ سے ہیں گل
شرمندہ انہیں کرتے ہیں۔۔۔ یہ غنچہ دہاں اور
نالوں سے پریشاں مرے ، افلاک کے باسی
کچھ چیرتی ہے دل کو مری طرزِ فغاں اور
خوگر ہوں میں اتنا۔۔۔۔۔۔۔۔۔۔ تری بیگانہ روی کا
تو پیار سے دیکھے بھی تو گزرے ہے گماں اور
اقبال گوہر