کہیں رستہ بنانا اور کہیں دیوار ہونا
بہت مشکل عمل ہے آئینہ بردار ہونا
زمانے بھر کی سننا سوچنا اور دل جلانا
عذاب جاں بنا ہے ذہن کا بیدار ہونا
تمہارے راستے آسان کرتا جا رہا ہوں
یہی ہوتا ہے خود سے بر سر پیکار ہونا
اسی کو زندگی کہتے ہیں بس اتنا سمجھ لو
کہانی میں تمہارا بھی کوئی کردار ہونا
سفر کی انتہا سب ہم سفر کہتے ہیں اس کو
خیالوں میں ذرا سی بھی کہیں تکرار ہونا
خدا کا شکر ہے معصومیت قائم ہے اب تک
خدا کا شکر ہے آیا نہیں ہشیار ہونا
مری مشکل یہی ہے اس قدر آسان ہوں میں
بہت آسان ہوتا ہے قمر دشوار ہونا
اقبال قمر