غزل
گھر سے باہر نکلے ہوئے تو گھر تک واپس آؤ بھی
جیون ہی جب گھات میں ہو تو کہیں کہیں رک جاؤ بھی
اس کا کیا ہے وہ تو سب کا تم ہی اکیلے پھرتے ہو
اب تم اپنے اکیلے پن کو اپنا میت بناؤ بھی
آنکھیں نم تھیں اور وہ اکثر نام تمہارا لیتا تھا
جانے والا اب نہ رکے گا آ جاؤ بھی آ جاؤ بھی
تم کو کیسے بھلا سکتا ہے مے خانہ تو تم سے تھا
دیکھو جام و سبو چپ چپ ہیں آؤ ہاتھ بڑھاؤ بھی
کل ہی تو اقبال متینؔ جس نیم کے نیچے بیٹھا تھا
آج اس کا سایہ بھی نہیں ہے کوئی پیڑ اگاؤ بھی
اقبال متین