ہیں دِگر گُوں ، اس قدر حالات ، پیارے ،شہر میں – Hain digar goon, is qadar halat pyare, sheher main

ہیں دِگر گُوں ، اس قدر حالات ، پیارے ،شہر میں
‏ہم نکلتے ہی نہیں اب ،غم کے مارے ، شہر میں

‏ تتلیوں سے کھیلنے کے دن ہیں جن پھولوں کے وہ
‏بیچتے ہیں ٹافیاں ، گیندیں ، غبارے ، شہر میں

‏ اب کوئی دِکھتا نہیں ، کاسوں میں سِکّے ڈالتا ‏
بس بھکاری ہی نظر آتے ہیں سارے شہر میں

چوک چورَاہَوں پہ ہے اب اجنبیت کا سَماں
غیر ہیں اب موسم و منظر ، ہمارے شہر میں

اب دِیا تک بھی نہیں روشن فصیل ِ شہر پر
جِھلمِلاتے تھے کبھی ہر سُو ستارے شہر میں

نفرتوں کے چھَپ رہے ہیں کیوں ضمیمے جا بجا ‏
ہَونگے شائع کب محبت کے شُمارے شہر میں ؟ ‏⁧‫

احمدرضاراجا